Трамп првпат полета со луксузниот авион што му го подари Катар

Американскиот претседател Доналд Трамп денеска првпат полета со преуредениот авион „Боинг 747“, кој Соединетите Американски Држави го добија како подарок од Катар. Луксузното летало, чија вредност се проценува на околу 400 милиони долари, минатиот месец официјално беше вклучено во претседателската флота.

— реклама —

Пред да биде пуштен во употреба, авионот поминал низ обемни безбедносни модификации, финансирани од американските даночни обврзници. Трамп со него отпатува во Северна Дакота, каде што ја посети новата претседателска библиотека на Теодор Рузвелт.

— реклама —

Пред полетувањето, американскиот претседател изјави дека граѓаните треба да бидат горди на новиот авион.

„Искрено, возбуден сум поради првиот лет. Мислам дека земјата треба да биде многу горда. Прекрасен е“, им рече Трамп на новинарите.

— реклама —

Трамп го прифати авионот како подарок од Катар во мај 2025 година, што предизвика бројни политички, правни и етички реакции во САД. Демократите го оценија потегот како „отворена корупција“, додека Белата куќа тврдеше дека станува збор за легален подарок од сојузничка држава.

— реклама —

Авионот е префарбан во црвена, бела и темносина боја, со што е напуштен препознатливиот сино-бел изглед што со децении го имаа претседателските авиони „Ер Форс Уан“.