Американскиот претседател Доналд Трамп изјави дека сериозно размислува за повторно започнување големи воени операции против Иран, вклучително и напади кои би биле поголеми од оние изведени за време на операцијата „Епски бес“.
Во изјава за „Аксиос“, Трамп рече дека е блиску до донесување одлука, но нагласи дека конечната одлука сè уште не е донесена. Двајца американски претставници, исто така, потврдија дека засега нема нови наредби до војската.
„Размислувам за огромен напад, поголем од кога било досега. Блиску сум до донесување одлука. Сè е подготвено за тоа“, изјави Трамп.
Тој додаде дека Израел би можел брзо да се приклучи доколку биде побарано, но истакна дека САД можат и самостојно да започнат нова операција против Иран. Притоа предупреди дека евентуалното учество на Израел би можело да предизвика последици, алудирајќи на можна иранска одмазда.
Трамп изјави и дека Иран сака да преговара, но според него сè уште не е подготвен за договор.
Во меѓувреме, според регионални извори запознаени со дипломатските напори, иранското раководство не го прифатило последниот предлог што му бил доставен.
Засилените тензии меѓу САД и Иран веќе влијаат врз светските пазари, при што цената на суровата нафта повторно надмина 100 долари за барел.
Во регионот дополнително се зголеми неизвесноста откако хутските бунтовници во Јемен, кои имаат поддршка од Иран, почнаа да напаѓаат саудиски бродови во Црвеното Море. Трамп на социјалната мрежа „Трут соушл“ порача дека доколку хутите продолжат со нападите врз бродовите, САД ќе го сметаат Иран за одговорен и ќе следи, како што наведе, „голема воена казна“.
Трамп откри и дека израелскиот премиер Бенјамин Нетанјаху планира следната недела да присуствува на комеморација во Вашингтон, додавајќи дека ќе се сретне со него доколку дојде во САД.
