Трамп сака САД да престанат со поместувањето на часовникот, предлогот заглави во Сенатот

Американскиот претседател Доналд Трамп повторно го повика Сенатот да го усвои предлогот со кој би се вовело трајно летно сметање на времето во САД и би се прекинала практиката на поместување на часовникот двапати годишно.

Предлогот веќе беше изгласан во Претставничкиот дом во јули, но не стигна до гласање во Сенатот пред неговото заминување на пауза. Сенатот нема да заседава до конгресните избори на 3 ноември, додека зимското сметање на времето во САД започнува на 1 ноември.

— реклама —

Трамп на социјалните мрежи оцени дека поместувањето на часовникот „ја чини државата цело богатство“, влијае врз криминалот, предизвикува стрес и негативно се одразува врз спортот и другите области.

— реклама —

Републиканскиот сенатор Џон Кенеди изјави дека смета оти иницијативата тешко ќе биде усвоена, додека сенаторот Рик Скот, еден од главните предлагачи, останува оптимист и очекува мерката повторно да биде разгледана кога конгресмените ќе се вратат на работа.

Противниците на предлогот предупредуваат дека трајното летно сметање на времето би значело подоцнежно изгревање на сонцето во зима. Тоа, според нив, би значело дека повеќе деца би оделе на училиште во темница, а истото би важело и за дел од работниците кои рано започнуваат со работа. Во некои делови од САД, сонцето во зима би можело да излегува околу 9 часот наутро или подоцна.

— реклама —

Поддржувачите, пак, сметаат дека поместувањето на часовникот го нарушува спиењето, може да придонесе за поголем број повреди на работа и сообраќајни несреќи, а трајното летно време би обезбедило повеќе дневна светлина во вечерните часови и би можело да поттикне економска активност.

Доколку предлогот биде усвоен, од 2027 година часовниците повеќе не би се враќале на зимско време. Сојузните држави би имале можност да бидат изземени и да го задржат зимското сметање на времето под одредени услови.

САД веќе имаат воведено трајно летно сметање на времето за време на Втората светска војна. Обидот бил повторен и во 1974 година со цел да се заштеди енергија, но мерката била непопуларна и Конгресот ја укинал уште истата година.