Американскиот претседател Доналд Трамп изјави дека САД ќе извршат нови напади врз Иран, откако претходно го обвини Техеран дека со дрон соборил американски хеликоптер „Апачи“ во близина на брегот на Оман.
Одговарајќи на новинарско прашање во Овалната соба за неговата претходна изјава дека Иран „ќе мора да ја плати цената“, Трамп рече:
„Ќе ги нападнеме, ќе ги нападнеме многу силно.“
На прашањето дали тоа значи продолжување на бомбардирањата, тој одговори потврдно.
„Да, со оглед на хеликоптерот, претпоставувам дека имаме право на тоа“, изјави Трамп.
Тој додаде дека американските сили веќе извршиле напади врз Иран и најави нови акции.
„Вчера силно ги погодивме и денеска повторно ќе ги погодиме, во случај да ви промакнало, во случај да не сте гледале телевизија“, рече американскиот претседател.
Трамп повторно го повика Иран да го прифати нуклеарниот договор што, според него, веќе е целосно договорен.
„Треба да го потпишат договорот. Тоа е добар договор. Тој му забранува на Иран кога било да поседува нуклеарно оружје“, изјави Трамп.
Тој додаде дека не му е јасно зошто Техеран сè уште не го прифаќа договорот.
„Не знам што прават. Договорот е целосно испреговаран, но Иран одолговлекува и одолговлекува“, рече Трамп.
