Трамп се закани со високи царини по предлогот Канада да стане придружена членка на ЕУ

Предлогот Канада да добие статус на прва „придружена членка“ на Европската Унија предизвика остра реакција од американскиот претседател Доналд Трамп, додека Европската комисија се обидува да ги смири тензиите и уверува дека продлабочувањето на соработката со Отава не е насочено против никого.

Трамп предупреди дека САД би можеле да воведат „многу високи царини“ доколку предлогот биде реализиран, а идејата ја опиша како „смешна“. Тој рече дека, доколку процени дека станува збор за непријателски потег кон САД, Вашингтон би можел да воведе високи царини или целосно да ја прекине трговијата со Европа во одредени сектори.

— реклама —

Сепак, американскиот претседател остави простор за договор доколку, како што рече, намерите се добри, но предупреди дека во спротивно Европа би можела да се соочи со „исклучително високи царини“.

Претседателката на Европската комисија Урсула фон дер Лајен го предложи подигнувањето на односите со Канада на повисоко ниво во средата, во годишното обраќање за состојбата во Унијата. Таа оцени дека продлабочувањето на партнерствата е потребно за зајакнување на отпорноста и демократијата.

— реклама —

Од Европската комисија порачаа дека иницијативата нема конфронтациска цел.

„Предложеното зајакнување на нашето партнерство со Канада не е насочено против никого, туку служи на нашата заедничка сила“, изјави заменик-главниот портпарол на Комисијата, Олоф Гил.

— реклама —

Од Европскиот парламент, пак, стигна поостра реакција на заканите од Трамп. Белгиската европратеничка Кетлин Ван Бремпт порача дека американскиот претседател не треба да има право на вето врз идните партнерства на Европа и дека притисокот нема да ја спречи соработката со Канада.

Идејата за „придружено членство“ засега нема разработен модел во рамките на Европската Унија. За воведување таков статус би биле потребни одлуки на Советот на ЕУ и согласност од Европскиот парламент.

Францускиот министер за надворешни работи Жан-Ноел Баро изјави дека земјите членки сè уште не се усогласиле околу понудата до Канада. Тој посочи дека целта е воспоставување што е можно поблиски односи со Отава, но дека конкретниот предлог прво треба да биде разгледан и детално анализиран.

Канадскиот премиер Марк Карни ја поздрави иницијативата во обраќањето пред европратениците во четвртокот. Тој ја пофали Фон дер Лајен за понудата, но не навлезе во конкретните детали за тоа како би функционирал евентуалниот статус на придружена членка.