Американскиот претседател Доналд Трамп викендов ќе го означи почетокот на трката од серијата IndyCar во Вашингтон со почесен круг во својата блиндирана лимузина, позната како „Ѕверот“, како дел од прославите по повод 250-годишнината од независноста на САД.
Трката „Freedom 250 Grand Prix“ ќе се вози по улиците на американската престолнина, покрај некои од најпознатите знаменитости, меѓу кои Капитол и музеите „Смитсонијан“. Возачите ќе треба да извозат 147 круга на патеката долга речиси три километри, при што болидите ќе достигнуваат брзина и до 300 километри на час.
Поради високите брзини, организаторите морале да заварат повеќе од 200 капаци од шахти долж патеката, со цел да спречат нивно поместување за време на трката.
Тренинзите и квалификациите ќе се одржат денеска, додека главната трка е закажана за утре. По почесниот круг, Трамп се очекува со зелено знаме да го означи стартот на трката.
Трошоците за организацијата ги покрива серијата IndyCar, а поради одржувањето на настанот дел од најфреквентните улици во Вашингтон ќе бидат затворени неколку дена. Предвидени се и строги безбедносни мерки, при што сите посетители ќе мора да поминат низ детектори за метал.
Трката е дел од летните настани со кои САД ја одбележуваат 250-годишнината. Прославите започнаа во јуни со боречки настан на УФЦ, кој се одржа во голем кафез поставен на тревникот пред Белата куќа.
