Американскиот министер за одбрана Пит Хегсет објави формирање на заедничка работна група на Пентагон и Министерството за правда, чија задача ќе биде да ги идентификува и кривично да ги гони лицата што неовластено доставуваат доверливи информации до медиумите.
Според „Гардијан“, ова е најнова ескалација во напорите на администрацијата на американскиот претседател Доналд Трамп за спречување на протекувањето на доверливи информации.
Во видео објавено на социјалната мрежа „Икс“, Хегсет изјави дека ја овластил канцеларијата на главниот правен советник на Министерството за одбрана да ги побара сите потребни податоци и поддршка за спроведување истраги за откривање доверливи информации во медиумите.
„Протекувањето информации ги загрозува човечките животи. Овие нови алатки и процедури значително ќе ни помогнат да ги заштитиме нашите сили. Пристапот до доверливи и тајни информации е света доверба, а оние што ќе ја изневерат ќе се соочат со целосната сила на законот“, изјави Хегсет.
Тој му се заблагодари и на вршителот на должноста државен обвинител Тод Бланш за поддршката, оценувајќи дека двете институции сега соработуваат поблиску од кога било.
Работната група е формирана откако „Њујорк тајмс“ објави дека администрацијата на Трамп им вратила судски покани на неколку новинари на весникот поради нивните текстови за безбедносните недостатоци на новиот претседателски авион што Доналд Трамп го добил како подарок од Катар.
Весникот објави дека новинарите треба да сведочат пред федерална голема порота во Њујорк, а претходно висок функционер на ФБИ побарал да не биде објавена една од сториите, повикувајќи се на националната безбедност. Истовремено, од редакцијата било побарано да ги открие своите извори, што „Њујорк тајмс“ го одбил.
Главниот правен советник на весникот, Дејвид Мекроу, оцени дека ваквиот потег претставува сериозна закана за слободата на медиумите.
Од Министерството за правда, пак, порачаа дека новинарите не се цел на истрагите, туку лицата што неовластено откриваат доверливи информации.
Ова не е прв ваков случај. Претходната година Министерството за правда се обиде да обезбеди сведочење и од новинари на „Волстрит џурнал“ и „Вашингтон пост“, но судските покани подоцна беа повлечени по правните реакции на медиумските куќи.
