Американскиот претседател Доналд Трамп навести дека САД можеби нема да ја поддржат Велика Британија во евентуален иден конфликт со Аргентина околу Фолкландските Острови.
Трамп својот став го поврза со однесувањето на Велика Британија во конфликтот со Иран, посочувајќи дека Лондон не ѝ помогнал на американската војска, иако, како што рече, помошта не им била потребна.
На прашањето дали би ѝ помогнал на Велика Британија во евентуален територијален спор, Трамп рече дека секогаш ги преиспитува своите ставови. Тој потсети дека побарал од НАТО и од британскиот премиер да испратат бродови, но оти му било одговорено дека немаат расположливи бродови.
Трамп и претходно навести дека Вашингтон би можел да го преиспита својот став за суверенитетот над Фолкландските Острови доколку Велика Британија не ги зголеми издвојувањата за одбраната. САД официјално имаат неутрален став за прашањето на суверенитетот, иако ја признаваат британската фактичка управа над островите.
Изјавите доаѓаат во пресрет на најавеното телевизиско обраќање на аргентинскиот претседател Хавиер Милеј, кој треба да зборува за историското право на Аргентина врз островите.
Фолкландските Острови се предмет на долгогодишен спор меѓу Велика Британија и Аргентина. Двете земји водеа војна во 1982 година, откако аргентинските сили ги зазедоа островите. Британските сили по 74 дена борби ја потиснаа аргентинската армија.
На референдумот во 2013 година, дури 99,8 отсто од жителите на островите гласаа да останат под британска управа.
