Американскиот претседател Доналд Трамп изјави дека специјалниот пратеник Стив Виткоф и Џаред Кушнер во Москва носат предлог за завршување на војната во Украина, изразувајќи надеж дека дипломатските напори ќе дадат резултат.
„Тие со себе носат предлог за завршување на војната“, изјави Трамп пред новинарите во Белата куќа, додавајќи дека Виткоф и Кушнер се „двајца одлични преговарачи“.
„Ги испративме да видат дали има доволно простор за нешто да се постигне. Можеби постои добра шанса да успееме“, рече американскиот претседател.
Трамп повторно го посочи личниот конфликт меѓу украинскиот претседател Володимир Зеленски и рускиот претседател Владимир Путин како една од пречките за завршување на војната.
„Постои личен проблем меѓу Русија и Украина. Ги имате претседателот Зеленски и претседателот Путин. Тие навистина се мразат. Меѓу нив постои сериозна омраза и тоа стои на патот“, изјави Трамп.
Според него, Русија и Украина само во изминатиот месец заедно изгубиле околу 32.000 војници, додека просечно месечно губат по 25.000.
Трамп истовремено изрази уверување дека Путин нема намера да нападне територија на НАТО.
„Не мислам дека Путин ќе го направи тоа. Разговарам со него. Многу добро го познавам. Путин нема намера да ја нападне територијата на НАТО“, рече Трамп.
