Соединетите Американски Држави го засилуваат фокусот на рударството и производството на критични минерали, а дел од новиот инвестициски пакет ќе биде насочен кон голем проект за ископ на бакар во Аризона.
Повеќе од една милијарда долари треба да бидат вложени во проектот „Санта Круз“, при што американскиот претседател Доналд Трамп порача дека рударството повторно станува државен приоритет. Според него, САД имаат цел да ја вратат позицијата на „минерална суперсила“.
Трамп истакна дека критичните минерали имаат стратешко значење за американската економија и безбедност, бидејќи се неопходни за одбранбената и автомобилската индустрија, како и за современите технологии.
„Ги враќаме рударите назад на работа и ја потврдуваме позицијата на Америка како светска минерална суперсила“, порача Трамп, додавајќи дека во последните 18 месеци неговата администрација потпишала и одобрила 160 договори за ископ на минерали, вредни 40 милијарди долари.
Тој наведе и дека процедурите за добивање рударски дозволи биле значително скратени – од период од три до пет години на само 25 дена.
