Трамп за Нетанјаху: „Биби, мора да го запреме ова“, па го нарекол луд поради нападите врз Либан

Американскиот претседател Доналд Трамп јавно потврди дека во телефонски разговор со израелскиот премиер Бенјамин Нетанјаху употребил навредливи зборови поради продолжувањето на израелските воени операции во Либан.

Во подкастот „Под Форс Ван“, Трамп потврди дека претходните медиумски извештаи за нивната расправија биле точни и откри дека му рекол на Нетанјаху дека е „проклето луд“ поради постојаните напади кои, според него, ја загрозуваат стабилноста на регионот.

— реклама —

„Бев малку вознемирен од фактот што постојано се бореше против Либан. Во еден момент од разговорот му реков: ‘Биби, мора да го запреме ова’“, изјавил Трамп.

Американскиот претседател објаснил дека интервенирал откако Вашингтон добил информации дека Израел подготвува масовно бомбардирање на централното подрачје на Бејрут, и покрај понудата за прекин на огнот што, според неговите зборови, била испратена преку либанските власти.

— реклама —

И покрај острите зборови, Трамп на крајот нагласил дека и понатаму има добри односи со израелскиот премиер.

„И покрај сѐ, јас многу го сакам Биби и генерално одлично соработуваме“, рекол Трамп.

По објавувањето на изјавите, Нетанјаху се обиде да ги намали шпекулациите за нарушени односи меѓу Вашингтон и Тел Авив.

— реклама —

Во интервју за американската телевизија Си-Ен-Би-Си, тој не се осврна на навредите, туку порача дека меѓу него и Трамп нема несогласувања околу клучните безбедносни прашања.

„Претседателот Трамп и јас сме целосно усогласени кога станува збор за справувањето со либанската милитантна група Хезболах“, изјави Нетанјаху.

Тој ги оправда израелските операции во Либан, оценувајќи дека Хезболах претставува закана за безбедноста на Израел и дека неговото разоружување е неопходен услов за траен мир во регионот.

Нетанјаху додаде дека е уверен оти Израел и САД имаат идентични цели кога станува збор за безбедноста и справувањето со заканите од групата поддржана од Иран.