Американскиот претседател Доналд Трамп изрази збунетост поради неуспешната егзекуција во Тенеси, каде што Криста Пајк преживеала смртоносна инјекција со која требало да биде погубена поради убиство извршено пред 31 година.
Трамп за случајот зборувал за време на посетата на Дентон, Тексас, откако новинар го прашал дали по неуспешната егзекуција планира да побара промени во начинот на извршување на смртната казна.
„Тоа беше интересна ситуација, но ќе треба да го прашате Тенеси дали ќе продолжи со егзекуциите“, одговорил Трамп.
Потоа Трамп му се обратил на американскиот конгресмен Рони Џексон, републиканец од Тексас и поранешен лекар во Белата куќа, кој бил дел од претседателската придружба.
„Знаете ли за што стануваше збор? За егзекуција каде што лекот не делувал. Тој би можел да одговори подобро од кој било. Како може ова да се случи?“, прашал Трамп.
„Не знам како може ова да се случи. Тоа би требало лесно да се изведе“, одговорил Џексон.
„Не би требало да биде особено тешко“, додал Трамп.
Адвокатот на Криста Пајк, Ренди Спиви, изјавил дека неговата клиентка е жива, но дека е во критична состојба и се наоѓа во болница.
Гувернерот на Тенеси, Бил Ли, случајот го нарекол „трагедија“ и објавил дека егзекуциите во сојузната држава се суспендираат до крајот на 2026 година.
Поради тоа, под знак прашалник е и егзекуцијата на Гери Вејн Сатон, која беше закажана за 3 декември.
Пајк во 1995 година, кога имала 18 години, заедно со тогашниот 17-годишен партнер Тадарил Шип и уште еден пријател ја намамиле 19-годишната Колин Слемер во шума во Ноксвил, каде што Шип и Пајк ја мачеле и ја убиле. Обвинителството тврдеше дека Пајк се сомневала оти Слемер е заинтересирана за Шип.
Од Управата за затвори на Тенеси соопштиле дека при обидот за егзекуција биле следени сите пропишани протоколи. Според правилата, службениците треба да подготват еден комплет шприцеви со смртоносна доза, но мора да имаат доволно лек во резерва за подготовка на втор комплет доколку тоа биде потребно.
Неуспешната егзекуција на Пајк се случи откако Тенеси претходно годинава не успеа да го погуби Тони Карутерс, осуден на смрт за тројно убиство извршено во 1994 година. Во тој случај, лекарот задолжен за егзекуцијата не успеал да пронајде вена кај осуденикот.
Републиканската сенаторка од Тенеси, Марша Блекбурн, која е сојузник на Трамп и се кандидира за гувернер на државата, повика повторно да се воведе електричната столица како метод за егзекуција.
Во Тенеси во 2000 година беше донесен закон со кој смртоносната инјекција стана главен метод за егзекуција. Сепак, лицата кои ги извршиле злосторствата пред 1999 година ја задржале можноста да побараат егзекуција со електрична столица.
