Трамп за средбата на шефот на ЦИА во Москва: „Можеби нешто ќе произлезе од тоа“

Американскиот претседател Доналд Трамп ја оцени како „полурутинска“ ненадејната посета на директорот на Централната разузнавачка агенција (ЦИА) Џон Ретклиф во Москва, каде што вчера разговарал со руски разузнавачки претставници.

— реклама —

Ретклиф со американски воен авион пристигнал во рускиот главен град и по само неколку часа ја напуштил земјата. Причината за посетата не беше официјално соопштена, што предизвика бројни шпекулации.

Трамп не откри детали од разговорите, но порача дека од средбата „можеби нешто ќе произлезе“, додавајќи дека Вашингтон сака да види крај на војната во Украина.

— реклама —

Кремљ потврди дека имало контакти меѓу американските и руските разузнавачки служби, но демантираше дека Ретклиф се сретнал со рускиот претседател Владимир Путин.

— реклама —

„Имаше контакти со разузнавачките служби. Средба со претседателот на Русија немаше“, изјави портпаролот на Кремљ, Дмитриј Песков.

Тој оцени дека контактите меѓу разузнавачките служби се позитивен процес, кој продолжува и во најтешки периоди на односите меѓу двете земји. Според Песков, сепак, прерано е да се зборува за тоа какво влијание ќе имаат разговорите врз билатералните односи.

Посетата на Ретклиф е една од ретките на толку висок американски разузнавачки претставник во Москва. Претходно, во ноември 2021 година, Москва ја посети тогашниот директор на ЦИА, Вилијам Барнс.