Пожарот што изминатите денови беснееше на потегот Раец – Дреново – Ќесендре во Општина Кавадарци е ставен под контрола, а надлежните очекуваат до крајот на денот целосно да биде изгаснат.
Директорот на Дирекцијата за заштита и спасување, Стојанче Ангелов, изјави дека станува збор за еден од најтешките пожари што ја зафатиле државата во последните денови.
„Во текот на вчерашниот ден имавме околу 30 пожари на отворен простор. Неколку од нив прераснаа во сериозни пожари, а најтежок беше токму овој во Кавадарци. Денеска од раните утрински часови дејствуваат три ер-трактори, кои заедно со локалните пожарникари помогнаа пожарот речиси целосно да биде ставен под контрола“, рече Ангелов.
Градоначалникот на Кавадарци, Митко Јанчев, информираше дека пожарот бил пријавен на 2 август околу 21 часот и дека огнот избувнал истовремено на пет различни локации, оддалечени меѓу себе од 500 до 700 метри.
„Станува збор за пожар кој, според нашите проценки, со 90 проценти веројатност е подметнат. Поради исклучително непристапниот терен и силниот ветер, не беше можно да се локализира уште првата вечер“, изјави Јанчев.
Тој посочи дека пожарот зафатил површина со радиус од околу седум километри, но благодарение на координираната акција на сите институции, огнот не се проширил кон високостеблестата шума, ниту предизвикал штета на куќи, викендички или земјоделски имот.
Во гаснењето учествувале пожарникари од Кавадарци и Неготино, припадници на полицијата, доброволни противпожарни друштва од Штип и Неготино, ЈП „Комуналец“, како и тешка механизација, меѓу која булдожери и ровокопачи за пробивање противпожарни пресеци. Од воздух интервенирале три ер-трактори, армиски и полициски хеликоптер.
Ангелов нагласи дека и покрај тоа што пожарот е ставен под контрола, најкритичниот период е во попладневните часови, кога поради високите температури постои опасност од повторно активирање на поединечни жаришта.
„На терен ќе останат пожарникарите кои веќе трет ден непрекинато работат, а ќе се вршат и постојани патроли сè додека не се елиминира и последното жариште“, рече Ангелов, упатувајќи благодарност до сите служби и до градоначалникот Јанчев за, како што оцени, одличната организација и координација во справувањето со пожарот.
