Три американски компании ќе платат милиони поради местење на цените на јајцата

Американското Министерство за правда и 17 сојузни држави постигнаа спогодба со три од најголемите производители на јајца во САД, со што се става крај на постапката во која компаниите беа обвинети дека со години незаконски ги договарале цените на јајцата.

Според обвиненијата, компаниите „Cal-Maine Foods“, „Versova“ и „Hickman’s Egg Ranch“ во периодот од јуни 2022 до март 2025 година координирано влијаеле врз дневните ценовни котации, со што вештачки ги зголемувале цените на јајцата.

— реклама —

Истрагата покажала дека компаниите ги усогласувале понудите што ги доставувале до „Urner Barry Publications“, компанија чиј индекс служи како референтна основа за формирање на цените на јајцата во малопродажбата и угостителството.

— реклама —

Иако ниту една од компаниите не призна вина, според постигнатата спогодба тие ќе исплатат вкупно 3,3 милиони американски долари, а дополнително ќе донираат 53 милиони јајца за банки за храна и непрофитни организации. Паричните средства ќе бидат распределени меѓу сојузните држави што учествуваа во постапката.

Како дел од договорот, компаниите ќе мора да спроведуваат програми за усогласување со антимонополските правила и ќе им биде забранета комуникација со конкурентите во врска со цените и стратегиите за понудите.

— реклама —

Американските власти наведуваат дека просечната цена на јајцата достигнала рекордни 6,23 долари за пакување од 12 јајца во март 2025 година, во период кога земјата беше погодена од епидемија на птичји грип. Производителите тврдеа дека високите цени се последица на уништувањето на милиони несилки, додека критичарите сметаа дека големите компании ја искористиле кризата за дополнителен профит.

— реклама —

По отворањето на истрагата во март 2025 година, ценовните котации значително се намалиле, а до мај 2026 година просечната цена на јајцата паднала на помалку од 2,20 долари за пакување од 12 јајца.

Спогодбите треба да добијат и судско одобрување пред да стапат во сила.