„Три силни потврди од ЕУ, Кошта и Вајц, разобличена е секоја лага на Мицкоски-реформи нема“, вели Жерновски

На денешната прес-конференција, секретарот за меѓународна соработка на СДСМ, Андреј Жерновски, оцени дека последните пораки од Европската Унија претставуваат потврда за нивните тврдења дека Владата не спроведува реформи и ја оддалечува државата од европскиот пат.

На прес-конференција Жерновски, посочи дека претседателот на Европскиот совет, Антонио Кошта, јасно порачал дека уставните измени се единствениот услов за формално отворање на преговорите со Европската Унија.

— реклама —

Според Жерновски, дополнителна потврда за состојбите во државата е и извештајот на известувачот за Македонија во Европскиот парламент, Томас Вајц, во кој, како што рече, се констатира недостаток на напредок во реформите, особено во владеењето на правото, правосудството и борбата против корупцијата.

— реклама —

„Во извештајот се наведува дека нема напредок во однос на претходниот период, што значи дека една година е изгубена без суштински реформи“, изјави Жерновски.

Тој се осврна и на делот од извештајот кој се однесува на странско мешање и кампањи за дезинформации, оценувајќи дека тоа е потврда на ставовите на СДСМ за, како што рече, поврзаноста меѓу ВМРО-ДПМНЕ и политиките на власта во Србија.

— реклама —

Од СДСМ обвинија дека премиерот Христијан Мицкоски и Владата немаат намера да спроведуваат европски реформи и дека со својата политика ја водат државата кон изолација.

Жерновски повторно повика на распишување референдум за европската иднина на државата, со образложение дека граѓаните треба директно да одлучат дали Македонија ќе продолжи по патот кон Европската Унија или ќе остане надвор од европските интеграции.

„Реформи сега. Европа сега“, порача Жерновски на крајот од обраќањето.