(Видео) Жерновски: Фон дер Лајен му ја зеде лагата на Мицкоски за идентитетот - сега намерно разгорува тензии пред средбата во Бугарија

На прес-конференција, членот на Извршниот одбор на СДСМ, Андреј Жерновски, обвини дека Владата, пред најавената средба со Бугарија, создава атмосфера што може да ги отежни разговорите и повторно ја става историјата во центарот на политичките пораки.

Жерновски се осврна на неодамнешните пораки на претседателката на Европската комисија, Урсула фон дер Лајен, во Скопје, тврдејќи дека тие, според него, ги побиле тврдењата на премиерот Христијан Мицкоски дека македонскиот идентитет и јазик биле загрозени.

— реклама —

Жерновски рече дека, според изјавите на Фон дер Лајен, македонскиот јазик, култура и идентитет се зачувани, а воедно оцени дека сега на дневен ред се реформите, соработката со Европското обвинителство и уставните измени.

Тој ги отфрли тврдењата за нова преговарачка рамка или дополнителни гаранции во процесот на европската интеграција, како и најавите за поинаков пристап кон Преспанскиот договор и уставното име.

— реклама —

Во продолжение, Жерновски ја критикуваше политиката на Владата кон Бугарија, оценувајќи дека пред средбата со источниот сосед се создава атмосфера што може да доведе до нејзино неуспешно одржување или отежнување на разговорите.

„Ќе нè тера да гледаме назад, не да гледаме напред. Ќе нè тера да зборуваме за минатото, а не да зборуваме за иднината“, рече Жерновски, според кого политичарите не треба да ја толкуваат историјата.

Тој нагласи дека СДСМ не ја оспорува историјата, но смета дека со неа треба да се занимаваат историчарите, а не политичарите.

— реклама —

Жерновски истакна и дека добрососедските односи се важен дел од процесот на европска интеграција и го критикуваше пристапот „разговараме, не преговараме“, кој, како што рече, го застапува премиерот.

Според него, повторното отворање на темите поврзани со Бугарија може да послужи како оправдување за отсуството на напредок кон Европската Унија.

— реклама —

Жерновски воедно ја поврза европската интеграција со прашањето за владеењето на правото и работата на Европското обвинителство, при што изнесе критики кон Владата и нејзини претставници.

Од СДСМ велат дека ќе продолжат да ја критикуваат политиката на Владата во однос на европските интеграции и оти нивна цел е Македонија да стане дел од Европската Унија.