Трифун Костовски ќе формира партија

Трифун Костовски преку објава на социјалните мрежи најави можност за формирање нов политички субјект, оценувајќи дека Македонија се наоѓа „на крстопат“ и дека државата се соочува со иселување, корупција и длабока општествена криза.

Костовски порача дека на државата ѝ е потребно обединување над партиските интереси и повика на создавање политичка опција која, како што наведува, нема да биде оптоварена со лични, национални или верски поделби.

— реклама —

„Македонија ќе опстане само ако ја ставиме над партиите, правдата над интересот и иднината над стравот“, напиша Костовски.

Во својата објава тој наведува дека масовното иселување на младите е најголемата загуба за државата и предупредува дека земјата се движи кон исчезнување доколку не се направат сериозни промени.

— реклама —

Според него, во изминатите 35 години политичките партии не успеале да изградат јасна визија за развој на Македонија, а државата останала заробена во корупција, криминал и партиски интереси.

Костовски смета дека економијата мора да стане главен приоритет на идната политичка платформа, а посебен акцент да се стави и на правдата, дипломатијата, културата, спортот и образованието.

„Не барам власт за себе, туку можност за освестување на државно ниво, Македонија да биде пред секоја партија“, истакна тој.

— реклама —

Во објавата, Костовски ги повика граѓаните да се вклучат со свои идеи и сугестии, додавајќи дека очекува напади од политичките партии, но дека е подготвен да се бори за, како што наведува, „вистината и иднината на татковината“.

Тој порача дека „време е граѓаните да престанат да бидат публика што ја гледа пропаста на својата земја“ и да станат двигатели на промените во Македонија.