(Видео) Трифуновски за инцидентот на митингот на СДСМ: Високи полициски функционери договарале да ме наместат, имаше тонски снимки

Зоран Трифуновски, организациски секретар на СДСМ, во гостувањето во подкастот „Претрес со Ландов“ зборуваше за инцидентот на завршниот митинг на СДСМ во Куманово, кога Сашо Алчев бил повреден во физичка пресметка со лица од обезбедувањето. Трифуновски тогаш бил дел од тимот за безбедност на партијата, а во разговорот ги објасни својата улога и настаните што следувале.

Според неговото сведочење, Алчев предизвикал инцидент, по што дошло до физичка пресметка меѓу него и дел од обезбедувањето.

— реклама —

„Јас во моментот единствено ја смирувам ситуацијата. Немам никаков физички контакт“, рече Трифуновски, објаснувајќи дека извадил службена легитимација од МВР и им кажал на присутните да се смират за да не дојде до поголем инцидент и стампедо.

Трифуновски тврдеше дека не видел дека Алчев бил прободен. Според него, тој бил свртен со грб кон лицата кои се пресметувале, бидејќи се обидувал да ја контролира толпата. Додаде дека на местото биле земени траги од крим-техника, но дека не било утврдено оти има траги од прободување.

— реклама —

Во разговорот беше отворено и прашањето за судскиот процес против Трифуновски. Тој потврди дека во 2015 година бил осуден во отсуство на шест години и три месеци затвор, а подоцна, по повторното судење, добил ослободителна пресуда во 2018 година.

Трифуновски рече дека по враќањето во Македонија бил приведен и поминал 80 дена во притвор, по што започнало повторното судење. Според неговото објаснување, во доказната постапка биле презентирани аргументи и докази врз основа на кои било утврдено дека не учествувал во инцидентот.

Тој се повика и на тонски снимки од прислушувани разговори, за кои тврдеше дека покажувале договор меѓу високи полициски функционери за да биде наместен случајот против него и други лица. На прашањето кои се функционерите што наводно разговарале, Трифуновски не ги откри нивните имиња, велејќи дека не сака да ги именува.

— реклама —

Во разговорот беше отворено и прашањето како дошол до снимките. Трифуновски рече дека тие биле обезбедени преку тогашното Специјално јавно обвинителство и дека првпат ги слушнал во судница. Не даде конкретно објаснување кој лично ги побарал и ги обезбедил за одбраната, упатувајќи на адвокатите и на постапката пред судот.

Тој ги отфрли и сугестиите дека Зоран Заев му помогнал да дојде до снимките, но потврди дека Заев бил еден од луѓето што му помогнале нему и на неговото семејство за време на периодот кога бил надвор од државата.

— реклама —

Трифуновски го опиша случајот како политички мотивиран процес и рече дека бил жртва на режимот, додека неговите тврдења за наводно местење на случајот ги поврза со постоењето на ослободителната пресуда.

Од „обид за убиство“ до врвот на СДСМ: „Претрес“ на Трифуновски за фештата, бегството, Алта Банка Гледај на LANDOV.MK 3:21:21