Тригодишно момче почина откако останало заробено во семејниот автомобил во местото Сен Гратјен, северно од Париз, во време кога Франција се соочува со екстремен топлотен бран и рекордно високи температури.
Станува збор за трет ваков трагичен случај во земјата во текот на оваа недела, пренесува „Еуроњуз“, повикувајќи се на обвинителството во Понтоаз.
Според првичните информации од истрагата, детето влегло во автомобилот додека неговиот татко мислел дека спие. Момчето не можело да излезе од возилото бидејќи била активирана детската безбедносна брава.
Јавниот обвинител Гирек Ле Бра изјавил дека родителите и пожарникарите се обиделе да го реанимираат детето, но без успех.
Според истрагата, мајката во тој момент спиела со нивното помало дете, старо 18 месеци, додека таткото работел во градината. Тој му рекол на синот да оди да спие, но детето било надвор од видикот на родителите најмалку 45 минути.
„Според сè, само се затворило во автомобилот и останало заробено, а родителите го пронашле во бессознание“, изјавил обвинителот.
Мајката на детето, која доживеала шок, била пренесена во болница.
Ова е последен во низата трагични случаи поврзани со екстремните горештини во Франција. Во понеделникот, телата на две деца, на возраст од две и четири години, биле пронајдени во семеен автомобил на паркинг во јужниот дел на земјата.
Франција деновиве се соочува со еден од најсилните топлотни бранови во својата историја. Во Париз се измерени над 40 степени Целзиусови, а метеоролозите предупредуваат дека актуелниот топлотен бран би можел да достигне размери слични на катастрофалниот бран од 2003 година, кога животот го загубија речиси 15.000 луѓе.
Властите упатија апел до граѓаните да избегнуваат изложување на сонце и престој на отворено во најтоплиот дел од денот.
