Тримесечно бебе почина по напад од куче во Англија

Тримесечно бебе почина вчера во местото Редкар, во англиската област Кливленд, како последица на тешки повреди здобиени во напад од куче, соопшти полицијата.

— реклама —

Според информациите на полицијата од Кливленд, инцидентот се случил во населбата Дорманстаун, каде покрај бебето била повредена и 31-годишна жена, која била пренесена во болница поради каснувања на раката.

Полицијата уапсила 45-годишен маж под сомнение дека е одговорен за кучето кое било „опасно и неконтролирано“, но тој по сослушувањето бил пуштен да се брани од слобода со кауција.

— реклама —

На местото на настанот интервенирале вооружени полициски единици, кои пронашле и усмртиле едно куче на улица, додека друго куче подоцна било еутаназирано. Од полицијата соопштија дека животните не припаѓале на забранети раси.

— реклама —

Полицијата ја опиша трагедијата како „шокантен и длабоко трагичен настан“ и повика јавноста да ја почитува приватноста на семејството, додека истрагата продолжува.

Според сведоштва, на местото биле испратени повеќе екипи на итната медицинска помош, а случајот останува предмет на понатамошна истрага.

Информациите се пренесени од британскиот медиум Sky News.