Средствата од ИПАРД програмата повторно им стојат на располагање на македонските земјоделци, откако Европската комисија потврди дека нема неправилности во постапките, соопшти Министерството за земјоделство, шумарство и водостопанство.
Од ресорното министерство во соопштението информираат дека по спроведената детална контрола било утврдено дека системот функционира правилно и дека институциите постапувале одговорно и транспарентно во управувањето со средствата.
Воедно се појаснува дека Брисел формално не ги блокирал средствата, туку по отворањето на случајот со злоупотреба поврзан со поранешен директор на Платежната агенција, бил активиран национален механизам и била побарана вонредна контрола. Целта, како што наведуваат, била да се спречат евентуални сомнежи и да се зачува довербата во системот, стои во соопштението.
По извршените проверки од надлежните структури, до европските институции била доставена сеопфатна информација согласно процедурите, по што било потврдено дека нема пропусти во постапките, стои во соопштението од Министерството.
Од Министерството во соопштението ги отфрлаат тврдењата дека средствата биле блокирани и оценуваат дека таквите информации предизвикале непотребна загриженост кај земјоделците.
Во пораката до земјоделците се наведува дека можат да продолжат со аплицирање и инвестирање, при што се најавува натамошна поддршка, модернизација и развој на секторот, како и засилена контрола и транспарентност во користењето на средствата, стои во соопштението.
