Новиот градоначалник на Венеција, Симоне Вентурини, предложи значително зголемување на цената на влезницата за еднодневните посетители на познатиот италијански град, со цел дополнително да се ограничи масовниот туризам.
Според неговиот предлог, наместо сегашните 5 до 10 евра, во деновите кога се очекува најголем број туристи, влезот во Венеција би можел да чини меѓу 30 и 50 евра.
Вентурини, кој победи на локалните избори како кандидат на десниот центар, смета дека сегашната цена не е доволна за да го намали притисокот од огромниот број посетители што секојдневно пристигнуваат во градот.
Во моментов, Венеција наплаќа влезница од 10 евра за еднодневни посетители во период од 60 дена до крајот на јули, додека оние што ќе резервираат најмалку три дена однапред плаќаат 5 евра.
Сепак, градоначалникот не може самостојно да ја зголеми цената. Иако таксата е воведена со локален пропис, максималниот износ е утврден со национален закон, па за евентуална промена ќе биде потребна согласност од Владата во Рим.
Експерти за уставно право предупредуваат дека наплата од 50 евра би можела да отвори правни дилеми и да се толкува како ограничување на слободата на движење.
