Твитер почнува да ја тестира долгоочекуваната опција „уреди твит“ која по 16 години од постоењето на мрежата им овозможува на корисниците да уредуваат твитови по објавувањето, но со опцијата се воведуваат одредени правила.
Одамна бараната опција моментално е во фаза на тестирање и најверојатно ќе функционира слично како опцијата „уреди“ на Facebook.
Според најавата на компанијата, твитовите ќе можат да се уредуваат неколку пати во рок од 30 минути од објавувањето.
„Модифицираните твитови ќе се појавуваат со специјална икона и временски печат, за да им биде јасно на корисниците дека не е оригиналниот твит“, се наведува во соопштението.
Ознаката на изменетите твитови ќе вклучува целосна историја на промени, а Твитер вели дека ја тестира опцијата на мал број корисници за да ја исклучи потенцијалната злоупотреба.
Меѓутоа, при конечното внатрешно тестирање на опцијата, функцијата „уреди твит“ ќе стане достапна само за претплатниците на "Twitter blue". Тоа значи дека доколку сакате да ја искористите опцијата, треба да се претплатите на оваа социјална мрежа со 5 долари месечно. Дали и кога ќе биде достапен за сите засега не е познато.
Џеј Саливен, потпретседателот на Твитер, на почетокот на оваа година изјави дека оваа опција „веќе многу години е најбарана“, но дека долго време не е воведена поради загриженост за можна злоупотреба.
