Полициските службеници во текот на изминатото деноноќие на територијата на целата држава лишиле од слобода 21 возач поради безобѕирно управување со моторни возила.
Од Министерството за внатрешни работи информираат дека 13 од приведените управувале возило без возачка дозвола. Од нив петмина биле затекнати во Скопје, двајца во тетовскиот регион, а по еден во Македонска Каменица, Куманово, Гостивар, Кичево, Дебар и Битола.
Дополнително, седум возачи биле лишени од слобода затоа што управувале возило под дејство на алкохол. Тројца од нив биле во Скопје, а по еден во Свети Николе, Куманово, Тетово и Велес.
Во Кичево, пак, бил приведен возач кој управувал возило и покрај тоа што имал изречена забрана за управување.
Од МВР најавуваат дека по целосно документирање на случаите против сите сторители ќе бидат поднесени соодветни кривични пријави.
Воедно, полицијата апелира до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит, доколку имаат забрана за управување или се под дејство на алкохол, со цел заеднички да се придонесе кон поголема безбедност во сообраќајот.
