Индонезиските власти уапсиле 72 лица осомничени дека предизвикале дел од шумските пожари и пожарите на отворен простор кои создадоа густ чад и опасна измаглица во повеќе делови од земјата.
Директорот за специјални кривични дела во Агенцијата за криминалистички истраги на Националната полиција, Мохамад Ирхамни, изјави дека осомничените се истражуваат во врска со 89 шумски пожари и пожари на отворен простор во пет провинции на островот Борнео и во уште четири провинции на Суматра.
Повеќето од осомничените, според полицијата, намерно палеле земјиште за да расчистат површини за плантажи со помали трошоци.
„Нема да застанеме кај сторителите на терен. Ќе утврдиме кој имал корист од овие активности и кој на крајот стоел зад нив“, изјави Ирхамни на прес-конференција во Џакарта.
Осомничените се соочуваат со парични и затворски казни, кои, според властите, може да достигнат и до 15 години затвор.
Пожарите создадоа густ облак од чад над делови од Борнео, третиот по големина остров во светот, кој го делат Индонезија, Малезија и Брунеи. Индонезија управува со околу три четвртини од островот, каде што Министерството за заштита на животната средина регистрирало повеќе од 3.700 жаришта.
Проблеми има и на Суматра, каде што денеска биле регистрирани повеќе од 1.700 жаришта. Густата измаглица на одредени места ја намалила видливоста на само десет метри.
Индонезиските власти продолжуваат со мерките за спречување на ширењето на пожарите. Над Калимантан се спроведува засејување на облаци за вештачко предизвикување дожд, а во акциите се вклучени 30 хеликоптери за гасење од воздух и воздушно патролирање. Дополнителни 22 хеликоптери се ангажирани над Суматра.
