Двајца поранешни министри од владата на унгарскиот премиер Виктор Орбан се приведени под сомнение за злоупотреба на јавни средства и примање мито, само неколку часа откако унгарскиот парламент им го укинал пратеничкиот имунитет, објавува „Гардијан“.
Државното обвинителство соопштило дека Балаш Ханко, поранешен министер за култура и пратеник од партијата Фидес, бил приведен доцна во понеделникот. Тој е осомничен за проневера, но ги отфрла обвиненијата.
Истиот ден бил приведен и Миклош Сештак, пратеник од сојузничката партија на Фидес, КДНП, кој од 2014 до 2018 година бил министер за национален развој. Тој е осомничен за примање мито, што исто така го негира.
Обвинителството тврди дека Ханко надгледувал незаконска злоупотреба на 17,3 милијарди форинти, односно околу 47 милиони евра, од Националниот фонд за култура. Според наводите, средствата биле насочувани кон уметници и групи поврзани со Фидес и биле користени за финансирање на предизборната кампања во 2026 година.
Сештак, пак, е осомничен дека примил повеќе од 12 милијарди форинти, или околу 32,6 милиони евра, во мито и провизии поврзани со набавка на возила за државната автобусна компанија и јавни градежни проекти. Истрагата се фокусира и на набавка на користени автобуси по наводно зголемени цени.
Премиерот Петер Маѓар, чија партија Тиса победи на изборите во април со ветување дека ќе ја истражи корупцијата и злоупотребата на функцијата за време на 16-годишното владеење на Орбан, изјави дека приведувањата се важен момент.
Во меѓувреме, и Маѓар останал без пратенички имунитет на сопствено барање. Тој е обвинет дека во 2024 година во ноќен клуб одзел телефон од човек кој го снимал и го фрлил во Дунав. Маѓар ги отфрла обвинувањата и случајот го нарекува политички обид за негова дискредитација.
Ова се првите случаи во кои високи функционери од ерата на Орбан се соочуваат со вакви истраги. Во понеделникот новата унгарска влада објави и четири случаи со кои ќе се занимава новоформираното антикорупциско тело.
