Српската полиција, во рамки на меѓународната операција „Пајтон“, уапси шест лица осомничени за сексуална експлоатација на деца преку интернет и поседување материјали со детска порнографија.
Акцијата била спроведена во продолжение на операцијата „Армагедон“, во координација со Европол, а во неа учествувале припадници на Службата за борба против високотехнолошки криминал во соработка со полициски управи во Белград, Нови Сад, Зрењанин, Ниш, Смедерево и Бор.
По наредба на Специјалното одделение за борба против високотехнолошки криминал при Вишото јавно обвинителство во Белград, биле уапсени шест лица, меѓу кои и државјанин на Руската Федерација.
Според информациите на српското Министерство за внатрешни работи, осомничените подолг временски период преку интернет преземале, чувале и споделувале содржини создадени со сексуална експлоатација на деца.
Истрагата покажала дека дел од осомничените користеле социјални мрежи и апликации за комуникација, при што отворале лажни профили, претставувајќи се како девојчиња на возраст од 11 и 12 години, со цел да воспостават контакт со малолетници и да добијат фотографии и видеоснимки со експлицитна содржина.
При претресите во домовите и просториите што ги користеле осомничените, полицијата запленила компјутери и друга електронска опрема. Со увидот во уредите биле пронајдени фотографии и видеоснимки кои прикажувале сексуална злоупотреба на деца на возраст од шест до 14 години.
На петмина од осомничените им е одредено задржување до 48 часа, по што ќе бидат изведени пред надлежното обвинителство, додека против едно лице е поднесена кривична пријава во редовна постапка.
Од српското МВР порачаа дека ќе продолжат со интензивните активности за заштита на децата од сите облици на злоупотреба во дигиталната средина, во соработка со домашни и меѓународни институции.
