Двајца лица се повредени во сериозен инцидент што утрово се случил во средно училиште во Загреб. Според информациите од полицијата, ученик со остар предмет нападнал друг ученик и вработен во образовната установа.
Нападот се случил околу 8 часот во училиштето на улицата „Конавоска“. Ученикот кој го извршил нападот веднаш бил ставен во полициски притвор.
Повредените биле пренесени на лекарски преглед и им била укажана медицинска помош. На местото на настанот се полициски екипи кои вршат увид и работат на расчистување на случајот.
„Денес, 11 септември, околу 8:00 часот, во образовна установа на улицата „Конавоска“ во Загреб се случи инцидент во кој ученик со остар предмет повредил друг ученик и вработен во установата“, соопшти Полициската управа на Загреб.
Од полицијата додаваат дека повредениот ученик и вработениот добиле лекарска помош, а против ученикот кој го предизвикал инцидентот се преземаат понатамошни полициски дејствија.
Во тек е криминалистичка истрага со која треба да се утврдат сите детали и околности под кои дошло до нападот.
Хрватските медиуми, повикувајќи се на неофицијални информации, објавуваат дека ученикот за време на нападот наводно носел фантомка.
