УЈП ги повика издавачите на сместување навреме да ги пријават приходите

Во екот на летната туристичка сезона, Управата за јавни приходи (УЈП) започна засилени активности насочени кон поттикнување на доброволното исполнување на даночните обврски и обезбедување фер услови за работа во туристичкиот сектор.

— реклама —

Во фокусот се приходите што физичките лица ги остваруваат од краткорочно издавање сместувачки капацитети, како што се апартмани, станови, куќи, викендички и соби, како и од други сезонски туристички дејности.

— реклама —

Како што информираат од УЈП, активностите опфаќаат објавување практични насоки за пријавување на приходите, директна комуникација и поддршка за даночните обврзници, размена на информации со други институции, анализи на ризик, насочени контроли, како и информативна кампања преку медиумите и социјалните мрежи.

— реклама —

Од Управата нагласуваат дека целта не е само укажување на законските обврски, туку и помош за граѓаните навремено и правилно да ги исполнат. Истовремено потсетуваат дека секој приход остварен од издавање сместувачки капацитети подлежи на оданочување согласно законските прописи.

УЈП најавува дека и во наредниот период ќе продолжи со анализи и контроли засновани на процена на ризик, со цел доследна примена на законите, спречување нелојална конкуренција и обезбедување еднакви услови за сите учесници на пазарот.