ТАВ Македонија ја повлече мерката со која беше ограничен бесплатниот пристап на едно возило во зоната „Hug & Fly“ на Меѓународниот аеродром Скопје на само еден влез во период од 24 часа.
Одлуката следува откако Комисијата за одлучување по прекршок при Комисијата за заштита на конкуренцијата, во рамки на анализата на условите и режимот за користење на зоната, побарала од ТАВ Македонија дополнителни појаснувања и релевантни податоци за воведеното ограничување.
По доставеното барање, ТАВ Македонија ја известила Комисијата дека ја повлекла одлуката за ограничување на бесплатниот пристап.
Од Комисијата ја поздравуваат одлуката и најавуваат дека ќе продолжат да ја следат состојбата и условите за пристап до аеродромската инфраструктура, особено од аспект на обезбедување еднакви и недискриминаторски услови за сите учесници на пазарот.
Комисијата за одлучување по прекршок при Комисијата за заштита на конкуренцијата посочува дека останува посветена на заштитата на конкуренцијата и ќе продолжи да постапува во рамки на своите законски надлежности кога постои можност одредени услови или мерки да влијаат врз конкуренцијата и интересите на граѓаните.
