Монако ја идентификуваше 39-годишната Украинка Анастасија Березовска како главна осомничена за бомбашкиот напад извршен со пакет, во кој тешко беа повредени украинскиот мултимилионер Вадим Јермолаев, неговата партнерка и нивниот 13-годишен син.
Заменикот на државниот обвинител на Монако соопшти дека Березовска е осомничена за обид за убиство, поставување експлозивна направа и здружување за извршување кривични дела. Според истрагата, таа најверојатно не дејствувала сама, а за неа Интерпол распиша црвена потерница.
Истражителите сметаат дека во понеделникот вечерта, непосредно пред 21 часот, осомничената оставила пакет во влезот на станбена зграда, по што следувала силна експлозија токму во моментот кога семејството влегувало во објектот. Безбедносните камери ја снимиле како носи темна капа и, според обвинителството, по нападот пеш се оддалечила од местото, а потоа со изнајмен автомобил преку Италија заминала кон Германија.
Според моначките власти, Березовска неколку дена ја набљудувала зградата и ги следела навиките на жртвите пред да го изврши нападот. Во меѓувреме, германските специјални полициски единици извршиле претрес во нејзиниот изнајмен стан во покраината Хесен и го заплениле возилото што го користела, но осомничената не била пронајдена и сè уште е во бегство.
Во нападот тешко се повредени двајцата возрасни, додека 13-годишното дете се здобило со полесни повреди и е во стабилна состојба. Според француската агенција АФП, Јермолаев повеќе не е во животна опасност, но состојбата на неговата партнерка и натаму е сериозна.
Иако властите официјално не го потврдија идентитетот на жртвите, локалните медиуми објавија дека цел на нападот бил Вадим Јермолаев, 58-годишен бизнисмен кој живее во Монако. Тој е поранешен украински државјанин, а од 2019 година поседува кипарско државјанство. Јермолаев има значајни деловни интереси во производството и продажбата на вино и алкохолни пијалаци на Крим, поради што украинските власти го ставија под санкции во 2023 година. Според „Форбс“, во 2020 година неговото богатство било проценето на околу 230 милиони долари.
