Три лица се повредени, од кои две се во критична состојба, во експлозија што синоќа ја потресе населбата во близина на француската граница во Монако, јавуваат светските медиуми.
Според првичните информации, меѓу тешко повредените е и украинскиот бизнисмен Вадим Јермолаев, кој од почетокот на војната во Украина престојува во Монако.
Експлозијата се случила околу 21 часот на влезот од станбена зграда. Претседателот на владата на Монако, Кристоф Мирманд, потврди дека трите повредени лица се пренесени во болница, но одби да потврди дали станува збор за целен напад.
Според медиумските извештаи, безбедносните камери снимиле лице кое непосредно пред експлозијата оставило ранец пред зградата, а потоа избегало од местото на настанот. Полицијата сè уште трага по осомничениот, кој наводно пеш се упатил кон францускиот град Босолеј.
На местото на настанот интервенирале околу 50 пожарникари и повеќе од 80 полицајци, а во истрагата се вклучени и француските служби за итни случаи. Француската и полицијата на Монако спроведуваат заедничка операција за пронаоѓање на сторителот.
Принцот Алберт Втори во соопштение ја опиша експлозијата како „криминален чин“ и „шок за целата заедница во Монако“, нагласувајќи дека сите надлежни служби работат на расветлување на случајот во координација со француските власти.
