Украинскиот олигарх Вадим Ермолаев е меѓу трите лица повредени во експлозијата што во понеделникот вечерта одекна во станбена зграда во Монако, додека осомничениот за нападот сè уште е во бегство.
Според извори блиски до истрагата, две лица се здобиле со тешки повреди, додека 13-годишно момче поминало со полесни повреди, пренесува „Франс 24“.
Според информациите на обвинителството во Монако, осомничениот оставил торба или пакет во влезниот дел на станбената зграда, по што ја активирал експлозивната направа и избегал од местото на настанот.
Кнезот Алберт Втори остро го осуди нападот, нарекувајќи го „грозоморно злосторство“, и порача дека безбедноста во кнежевството останува врвен приоритет.
Властите соопштија дека станува збор за прв ваков инцидент во историјата на Монако и дека се спроведува интензивна истрага во координација со француските безбедносни служби.
Осомничениот бил идентификуван преку снимките од безбедносните камери и бил забележан како го напушта местото на настанот и се упатува кон соседниот француски град Босолеј.
Повредените лица се пренесени на лекување во болници во Ница, а мотивите за нападот засега не се познати. Во меѓувреме, безбедносните мерки во Монако се дополнително засилени.
