Истрагата за минатонеделниот напад во средно училиште во Шведска се проширува, откако обвинителството приведе уште едно лице осомничено дека му помогнало на напаѓачот.
Вториот осомничен е приведен под сомнение дека помогнал во убиството и обидот за убиство, соопшти шведското обвинителство. Засега не се открива на кој начин тој наводно му помогнал на осомничениот напаѓач.
Обвинителството во четврток треба да одлучи дали ќе побара од судот на вториот осомничен да му биде одреден притвор.
Нападот се случи минатиот петок во средното училиште „Бринел“ во градот Фагерста, во централниот дел на Шведска. Во нападот, 18-годишен маж, според досегашните информации, со меч усмртил 17-годишна девојка, а повредил уште три лица.
Полицијата истиот ден го уапсила 18-годишниот осомничен, за кого се верува дека е директниот извршител.
Во рамките на истрагата се проверува и неговата можна активност во интернет-заедници кои промовираат насилство во училиштата. Информацијата за оваа проверка беше потврдена од извор запознаен со истрагата.
Со приведувањето на второто лице, истрагата сега треба да утврди дали и на кој начин други лица биле вклучени во нападот.
