Премиерот Христијан Мицкоски не ги потврди, но ниту ги демантираше информациите за кадровските промени во Владата, посочувајќи дека конечните одлуки ќе бидат познати по состанокот на Извршниот комитет на ВМРО-ДПМНЕ.
„Не сме разговарале за имиња. Имаме договор околу ресорите. Додека не се заврши состанокот на Извршниот комитет на партијата – нема да коментирам ни ресори ни кадровски решенија“, рече Мицкоски.
Запрашан кога ќе има промени на директорските позиции, премиерот најави дека тие ќе следуваат по реконструкцијата на Владата и ребалансот на Буџетот.
„Овој месец е планирана реконструкција, ребаланс. Потоа во август Собранието е на годишен одмор, па ќе видиме од септември“, изјави Мицкоски.
„Скопје1“ претходно објави дека, според информации од повеќе извори, најмалку пет министри ќе ги напуштат функциите во претстојната реконструкција на Владата.
Според сознанијата на редакцијата, промени се очекуваат во министерствата за правда, здравство, култура, образование и земјоделство, а можни се и дополнителни кадровски рокади.
Неофицијално, реконструкцијата треба јавно да биде соопштена во вторник, по седницата на Извршниот комитет на ВМРО-ДПМНЕ.
Според информациите на „Скопје1“, од Владата заминуваат Азир Алиу од Министерството за здравство, Цветан Трипуновски од Министерството за земјоделство, Игор Филков од Министерството за правда, Весна Јаневска од Министерството за образование, Зоран Љутков од Министерството за култура, како и Фатмир Лимани од Министерството за труд и социјална политика. Последна информација е дека министерувањето завршува и за Иван Стоилковиќ, од министерството за политички систем односи меѓу заедниците.
За Министерството за земјоделство, според истите информации, се очекува да биде предложен Борче Серафимовски, актуелен државен секретар во ресорот.
Покрај министерските позиции, веќе е најавено дека ќе следуваат и промени на директорските места, но засега не се соопштуваат имиња ниту детали за можните трансфери.
