Вандализирано детското игралиште „Патрик“, Општина Аеродром најави пријави против сторителите

Детското игралиште „Патрик“ во Општина Аеродром било сериозно оштетено откако, според информациите од општината, група млади лица извршила вандализам врз дел од реквизитите и опремата.

— реклама —

По инцидентот, градоначалникот на Општина Аеродром, Дејан Митески, извршил увид на терен заедно со општинските служби.

Од Општина Аеродром информираат дека станува збор за едно од најуредените детски игралишта во општината, а првичните проценки покажуваат дека причинетата штета изнесува повеќе илјади евра.

— реклама —

Поради безбедносни причини, игралиштето е привремено затворено, а во најкус можен рок ќе започне санација на оштетувањата и замена на уништените реквизити.

— реклама —

Случајот е пријавен во полиција, а против сторителите се поднесени соодветни пријави.

Од Општина Аеродром упатија благодарност до сограѓанинот Никола Поповиќ, кој, како што наведуваат, со својата навремена реакција помогнал да се спречи натамошно оштетување на игралиштето.

— реклама —

„Мора да ставиме крај на ваквите појави. Јавното добро не е ничие приватно игралиште за уништување. Тоа е создадено со средства на граѓаните и обврска на сите нас е да го чуваме и почитуваме“, порачаа од Општина Аеродром, апелирајќи граѓаните да пријавуваат случаи на вандализам и уништување на јавен имот.