Венс без коментар за Нетанјаху пред разговорите со Иран во Швајцарија

Американскиот потпретседател Џеј Ди Венс одби да одговори на новинарско прашање за израелскиот премиер Бенјамин Нетанјаху на почетокот на билатералните разговори со пакистанските посредници во Швајцарија, во пресрет на денешните разговори со иранските претставници.

— реклама —

За време на средбата во одморалиштето Бургеншток во близина на Луцерн, новинар го праша Венс каква порака има за Нетанјаху, но американскиот потпретседател не одговори. Наместо тоа, тој само кратко им се заблагодари на пакистанските претставници за нивното присуство, без да даде официјални изјави, објави Си-Ен-Ен.

Настанот се случува во период на зголемени тензии меѓу Вашингтон и Тел Авив. Администрацијата на американскиот претседател Доналд Трамп во последниот период сè погласно изразува незадоволство од израелската воена кампања во Либан, предупредувајќи дека ескалацијата на конфликтот меѓу Израел и Хезболах може да ги загрози кревките преговори за примирје со Техеран.

— реклама —

Венс ден претходно, во интервју за „Фокс њуз“, изјави дека САД и Израел можеби имаат „различни пристапи“ за постигнување на целите поврзани со прекинот на насилството во регионот.

— реклама —

„Претседателот Доналд Трамп е единствениот шеф на држава во светот кој во овој момент стои на страната на Државата Израел“, рече Венс.

Тој воедно упати и предупредување до израелските власти, велејќи дека, доколку бил дел од израелската влада, не би го напаѓал „единствениот моќен сојузник што му преостанува на Израел во светот“.

— реклама —

Изјавите на Венс дополнително ги поттикнаа шпекулациите за можни несогласувања меѓу Вашингтон и Тел Авив во однос на развојот на ситуацијата на Блискиот Исток.