Потпретседателот на Соединетите Американски Држави, Џеј Ди Венс, изјави дека преговорите со Иран ќе бидат сложени и дека не очекува брзо постигнување договор.
Во интервју за „Фокс њуз“, Венс оцени дека политичкиот систем во Иран е поделен и дека постојат различни струи со спротивставени ставови.
„Иранците се исклучително тешки соговорници и имаат фрагментиран систем. Постојат луѓе кои сакаат војната да заврши, но има и радикални кругови кои сакаат нејзино продолжување“, изјави Венс.
Тој додаде дека задачата на американската администрација е, и покрај таквите околности, да обезбеди најдобар можен исход за Соединетите Американски Држави.
Според Венс, договор со Техеран веројатно нема да биде постигнат во блиска иднина, но изрази уверување дека Вашингтон ќе ги оствари своите цели.
„Верувам дека на крајот цената на нафтата ќе се намали и ќе остане ниска. Иран никогаш нема да поседува нуклеарно оружје, а САД ќе бидат во посилна позиција“, рече тој.
Потпретседателот нагласи дека не треба да се извлекуваат заклучоци додека преговорите сè уште траат, додавајќи дека САД ќе продолжат да се потпираат на комбинација од воен притисок, економски мерки и дипломатија за да ги постигнат своите цели.
