Американскиот потпретседател Џеј Ди Венс изјави дека евентуалниот договор со Иран е конципиран така што во преден план се интересите на САД и нивните сојузници, нагласувајќи дека Техеран нема автоматски да добие финансиски придобивки.
„Иран нема да добие никакви пари ниту ќе му бидат одобрени средства само затоа што потпишал договор или учествувал на состанок“, порача Венс во објава на социјалната мрежа Икс.
Тој додаде дека доколку Исламската Република Иран ги исполни преземените обврски, економските придобивки ќе ги почувствуваат не само Иран, туку и целиот регион.
„Овој договор има потенцијал да го преобликува регионот и да донесе траен мир“, истакна американскиот потпретседател.
Венс веднаш изрази уверување дека американскиот претседател Доналд Трамп ќе обезбеди позитивен исход од процесот.
„Претседателот Трамп ќе постигне добар исход, на овој или на оној начин“, порача Венс.
