Американскиот потпретседател Џеј Ди Венс изјави дека Иран би можел да добие пристап до фонд за обнова вреден 300 милијарди долари, кој би бил финансиран од земјите од Персискиот залив, но само доколку ги исполни строго утврдените обврски од договорот со САД.
„Тоа е нешто до што би можеле да добијат пристап, а што би го финансирала коалиција на заливски земји, сè додека ги почитуваат своите обврски“, изјави Венс во интервју за CBS.
Тој предупреди дека тврдокорните струи во Иран ќе се обидат да ги преувеличат придобивките од договорот, а истовремено да го минимизираат значењето на отстапките што Техеран треба да ги направи.
Иако нагласи дека Вашингтон е отворен за повеќе опции, Венс ги демантираше медиумските наводи дека дел од договорот предвидува одмрзнување на 24 милијарди долари ирански средства.
Прашањето за финансиската помош останува особено чувствително во САД, особено кај критичарите кои потсетуваат на одлуките на администрацијата на Барак Обама за одмрзнување на ирански имот, што тогаш предизвика жестоки реакции и обвинувања дека на тој начин индиректно се финансираат проирански групи.
Венс посочи дека деталите ќе се разработуваат во наредните технички преговори, но повтори дека клучниот услов останува непроменет.
„Подготвени сме да разговараме за одмрзнување на имотот. Но, многу поважно е укинувањето на санкциите за нивната економија, сè додека даваат долгорочни гаранции поврзани со нивната нуклеарна програма“, изјави американскиот потпретседател.
Тој нагласи дека Иран ќе може да добие пристап до средствата само доколку се обврзе дека нема да развива ниту да набавува нуклеарно оружје.
