Венс му противречи на Трамп: Бесплатниот премин низ Ормускиот теснец допрва ќе се договара

Само неколку дена пред најавеното потпишување на мировниот договор меѓу САД и Иран во Швајцарија избувна нов дипломатски спор околу режимот на пловидба низ Ормускиот теснец.

Откако американскиот претседател Доналд Трамп објави дека стратешкиот морски премин ќе биде отворен без никакви давачки, од иранското Министерство за надворешни работи порачаа дека ќе се наплаќаат надоместоци за поморски услуги.

— реклама —

Портпаролот на иранското МНР, Есмаил Багаеи, изјави дека Иран, во координација со Оман, ќе наплаќа такси за навигациски услуги, заштита на животната средина, потенцијално осигурување на бродовите и други услуги поврзани со безбедноста на пловидбата.

— реклама —

Во меѓувреме, американскиот потпретседател Џеј Ди Венс призна дека прашањето сè уште не е целосно решено и дека деталите ќе бидат предмет на претстојните технички преговори.

„Нашето очекување е теснецот долгорочно да остане отворен без патарини, но тоа допрва треба да се дефинира во техничките разговори“, изјави Венс, со што индиректно потврди дека конечен договор за ова прашање сè уште не постои.

— реклама —

Дополнителна неизвесност создадоа и медиумски извештаи блиски до иранските власти, според кои Техеран е подготвен да овозможи бесплатен транзит низ Ормускиот теснец во период од 60 дена, по што би вовел задолжителни надоместоци.

Во исто време, Вашингтон порачува дека враќањето на Иран на светските пазари ќе зависи од исполнувањето на обврските поврзани со неговата нуклеарна програма.

Иранската делегација во меѓувреме започнува дипломатска турнеја низ земјите од регионот пред пристигнувањето во Женева, додека конечната одлука за механизмот за потпишување на меморандумот се очекува најдоцна до утре.