На денешното рочиште за пожарот во дискотеката „Пулс“ во Кочани, градежните вештаци од Градежниот факултет при УКИМ одговараа на прашања за градежните зафати, вградените материјали и исполнувањето на условите за функционирање на објектот.
Судскиот вештак и професор Горан Марковски посочи три надворешни елементи кои, според вештачењето, директно укажуваат на пренамена на објектот – надворешните скали, настрешницата над нив и информативната табла над влезот. Тој нагласи дека за поставување на таблата било потребно одобрение од Општината и дека надлежните требало да реагираат.
Марковски остана на ставот дека градежните зафати од 2012 година претставуваат реконструкција, а процесот продолжил и во 2024 година. Како реконструкција ги посочи и поставувањето и отстранувањето на галериите, бидејќи со таквите активности се влијае врз основните барања на градбата.
Во однос на материјалите, вештакот посочи дека полиетиленскиот сунѓер поставен на објектот не го исполнува прописот според кој материјалите кај спуштените тавани треба да имаат отпорност на горење од најмалку 30 минути.
„Не се очекува од инвеститор да знае сè за градбата, но должен е да побара проект од стручни лица кои знаат кои материјали смеат да се користат“, рече Марковски, објаснувајќи го системот на контрола преку проектантите, ревизијата, Дирекцијата за заштита и спасување и надзорот при вградувањето на материјалите.
Одбраната побара да не биде сослушано вештото лице Викторија Димовска, најавувајќи барање за нејзино изземање. Судот го прекина нејзиниот распит, а обвинителите продолжија со прашања до останатите вешти лица.
Родителите на загинатите деца реагираа дека „баналните детали станале поважни од суштината“. Александар Наунов праша како било дозволено објектот 13 години да функционира како дискотека во поранешен салон за теписи и посочи дека токму тука се отвора прашањето за институционалната одговорност.
Наунов изјави и дека родителите имаат доверба во обвинителството и судот во однос на истекот на притворот на првообвинетиот Дејан Јованов, кој, според него, треба да излезе на 3 октомври.
