Вештакот на одбраната за „Пулс“ тврди дека објектот ги исполнувал основните минимални технички услови за угостителска дејност – кабаре

Вкрстеното испитување на градежниот вештак Петре Русески, ангажиран од одбраната во судскиот процес за пожарот во дискотеката „Пулс“ во Кочани, продолжи со прашања од Обвинителството за неговите претходни ангажмани и за опсегот на изготвеното вештачење. Русески изјави дека не гледа причина за негово изземање и остана на ставот дека од градежен аспект објектот одговарал на својата намена.

Обвинителката Наташа Сарамандова го праша дали смета дека постојат причини за негово изземање, посочувајќи дека Обвинителството проверува дали ангажираните вештаци се соочуваат со постапки или имаат правосилни осуди. Беа отворени и прашања за неговата претходна соработка со други вешти лица, меѓу кои Василка Каевска, која учествувала во вештачење побарано од обвинетите Николчо Коцев и Љупчо Стаменков.

— реклама —

На прашањето за соработката на Каевска со Коцев и Мирослав Грчев во вештачења за „Инкс дрим“ АД Струга, Русески одговори потврдно, но рече дека не смета оти треба да биде изземен. Тој појасни дека Каевска му помагала во одговарањето на прашањата поврзани со вештачењето, додека геодетот Инает Ертани бил ангажиран како консултант.

Одбраната реагираше на начинот на испитување, оценувајќи дека вештакот е изложен на малтретирање и навреди.

— реклама —

Во продолжението, обвинителот Дарко Јакимовски се осврна на делови од вештачењето поврзано со првообвинетиот Дејан Јованов. Во документот Русески навел дека во објектот биле исполнети основните минимални технички услови за угостителска дејност – кабаре, но истовремено посочил дека за оценување на противпожарната функционалност, евакуацијата, електричната инсталација, вентилацијата и паничното осветлување се потребни процени од овластени стручни лица или надлежни органи.

Русески потврдил дека неговото мислење се однесува само на градежно-архитектонскиот аспект. Тој тврдеше дека конструкцијата и материјалите во објектот, од градежна гледна точка, не придонеле за пожарот, но додаде дека за утврдување на влијанието на материјалите врз ширењето на огнот е потребно да се испита нивната реакција.

— реклама —

Внатрешното уредување на објектот, според него, претставувало градежно-занаетчиски работи, а не адаптација или реконструкција во градежна смисла. На забелешката на Обвинителството дека Законот за градење не го дефинира овој термин, Русески одговори дека за таквите работи не биле потребни одобрение, овластување и лиценци, иако терминот се користел во стручната практика.

Неговото вештачење и тврдењата дека објектот ги исполнувал условите за работа предизвикаа реакции и на претходното рочиште. Александар Наунов, родител на една од жртвите, тогаш изјави дека градежните зафати не можат да се третираат како обични занаетчиски работи за да се избегне одговорноста за градење без одобрение. Тој нагласи дека процесот се однесува и на безбедноста, одговорноста и загубените човечки животи.

Судењето го води судијката Дијана Груевска-Илиевска, а обвинението го застапува тим од 15 јавни обвинители. Процесот продолжува со изведување докази предложени од одбраната.

Пожарот во дискотеката „Пулс“ во Кочани избувна на 16 март 2025 година за време на концерт на групата ДНК. Во трагедијата загинаа 63 лица, а повеќе од 200 беа повредени.