(Видео) 14 загинати при уривање на нелегален рудник за злато во Колумбија

Најмалку 14 лица загинале, а седуммина биле повредени при уривање на нелегален рудник за злато во југозападна Колумбија. Потрагата по преживеани е завршена, потврдил Алекс Гонзалес, секретар за мир и безбедност на департманот Нарињо, пренесува „Еуроњуз“.

На снимките објавени на социјалните мрежи се гледа како луѓе и багер ги пренесуваат телата од рудникот во кануа на блиската река Из.

— реклама —

Од канцеларијата на гувернерот соопштиле дека спасувачките екипи тешко стигнувале до местото на несреќата поради непристапниот терен и присуството на криминални групи во областа.

Област под контрола на криминални групи

— реклама —

Департманот Нарињо, кој се наоѓа на границата со Еквадор, е едно од средиштата на нелегалното рударство. Вооружени групи ја контролираат тајната трговија со злато, а се занимаваат и со шверц на дрога и изнуда.

Извор од канцеларијата на гувернерот објаснил дека локалното население нема други можности за заработка.

— реклама —

„Локалните заедници немаат друг избор освен да ги работат овие исклучително опасни работи. Традиционалното рударство во мал обем практично исчезна“, изјавил тој.

Несреќите во рудниците се чести во Колумбија, особено на места што не се под државна контрола.

Жителите на општината во која се урнал рудникот и претходно пријавувале целни убиства извршени од вооружени групи. Како можни мотиви се наведуваат сомневањата за соработка со безбедносните сили, поврзаност со ривалски организации или кражба на злато.