(Видео) Американската војска погоди и онеспособи трговски брод во Оманскиот Залив

Американската војска нападнала и онеспособила трговски брод во Оманскиот Залив откако неговиот екипаж, според тврдењата на американските сили, не ги почитувал повеќекратните предупредувања и се обидел да ја пробие поморската блокада на Иран.

Инцидентот се случил вчера, а американската Централна команда (CENTCOM) соопшти дека воен авион со прецизни ракети го погодил задниот дел од товарниот брод „М/В Худа“, кој плови под знамето на Свети Кристофер и Невис.

— реклама —

Според CENTCOM, бродот претходно бил закотвен во иранско пристаниште, а потоа се обидел да ги напушти регионалните води. Американските сили тврдат дека екипажот повеќепати ги игнорирал предупредувањата и се обидел да ја прекрши блокадата.

Пред нападот, американската војска им наредила на членовите на екипажот да се оддалечат од деловите на бродот што требало да бидат погодени. Потоа воениот авион отворил оган и го онеспособил пловилото. Објавена е и снимка од нападот, но засега нема информации дали има повредени членови на екипажот и колкава е материјалната штета.

— реклама —

Вашингтон тврди дека од почетокот на поморската блокада во јули американските сили пренасочиле 147 трговски бродови чии екипажи ги почитувале наредбите, додека пет пловила биле онеспособени поради непочитување на предупредувањата. Американската војска наведува и дека уништила десет ирански танкери поврзани со мрежа за транспорт на нафта под контрола на Иранската револуционерна гарда.

Според американските процени, блокадата досега го спречила Иран да извезе сурова нафта во вредност поголема од 25 милијарди долари.

— реклама —

Нападот врз бродот се случил еден ден по новите ограничени американски удари врз Иран, насочени кон системите за противвоздушна одбрана. Американскиот претседател Доналд Трамп ги потврдил нападите, додека Техеран предупредил дека може да возврати со напади врз инфраструктура во земјите од Персискиот Залив.

Дополнително, американската војска најавила формирање на посебна единица чија задача ќе биде спречување на транспорт на напредно оружје, технологија со двојна намена и стока под санкции преку копнените граници на Иран и Каспиското Езеро.

— реклама —

Тензиите дополнително се зголемиле по објавата на Иранската револуционерна гарда дека два танкери налетале на мини во Ормускиот Теснец откако, според нејзините тврдења, пловеле по недозволени маршрути. Овие наводи засега не се независно потврдени.