(Видео) Американски борбен авион погоди товарен брод кај Иран

Американската војска вчера нападна товарен брод во Оманскиот Залив, откако неговиот екипаж, според тврдењата на американските сили, ги игнорирал повторените предупредувања и се обидел да ја пробие поморската блокада на Иран.

Американски борбен авион го погоди задниот дел од бродот M/V Ocean Molica, познат и како Arika Sun, кој плови под панамско знаме. Со прецизно наведуван проектил бил онеспособен погонскиот систем на бродот, а ниту еден член на екипажот не бил повреден, соопшти американската Централна команда (CENTCOM).

Според тврдењата на Американците, бродот претходно испловил од иранско пристаниште и се обидувал да продолжи со пловидбата и покрај блокадата.

— реклама —

Американските сили на 14 јули ја обновиле поморската блокада на сите бродови што влегуваат во иранските пристаништа или испловуваат од нив.

CENTCOM наведува дека во последните три месеци биле онеспособени четири комерцијални брода, додека уште 135 бродови биле принудени да се вратат назад.

— реклама —

Во истиот период, американската војска уништила и десет танкери за кои тврди дека се поврзани со мрежата на Иранската револуционерна гарда за заобиколување на санкциите.

„На сите поморски екипажи им се препорачува да ги почитуваат предупредувањата на CENTCOM во врска со блокадата“, соопшти американската команда.

— реклама —

Екипажите на бродовите биле повикани да ги следат официјалните поморски известувања и да стапат во контакт со американските поморски сили преку радиоканалот 16 додека пловат низ Оманскиот Залив и приодите кон Ормускиот Теснец.

Нападот се случил во период на сè поголеми проблеми со поморскиот сообраќај во регионот поради војната на САД и Израел против Иран, која започнала кон крајот на февруари.

Според Reuters, бројот на бродови што минуваат низ Ормускиот Теснец паднал на најниско ниво во повеќе од два месеца, откако нападите врз танкерите минатата недела ја достигнале највисоката зачестеност од почетокот на војната.

Ормускиот Теснец е една од најважните поморски рути за светската трговија со енергенси. Пред војната, низ него минувала нафта во количина што одговарала на приближно една петтина од светската потрошувачка.

Американската војска и претходно со сила запирала бродови што се обидувале да ја пробијат блокадата. Во мај, борбен авион F/A-18 од носачот на авиони USS Abraham Lincoln со топовски оган го онеспособил кормилото на иранскиот танкер Hasna, кој се обидувал да влезе во иранско пристаниште.

Reuters не успеал веднаш да стапи во контакт со операторот на бродот Ocean Molica за да добие коментар за најновиот напад.