Она што соседите во американскиот град Белвју, во сојузната држава Вашингтон, со месеци го сметале за обична куќа со неконтролирани забави, се претворило во шокантна истрага за трговија со луѓе и сексуална експлоатација.
По бројни поплаки за гласна музика, блокирани улици и постојани забави, полицијата извршила рација во луксузна вила и открила докази кои, според истражителите, укажуваат дека објектот функционирал како место за производство на содржина за возрасни за платформите OnlyFans и Chaturbate.
При претресот биле пронајдени повеќе од 300 мобилни телефони, над 50 лаптопи, бележник со имиња на жени и нивната заработка, табла со натпис „План за содржина“, финансиска документација и повеќе луксузни возила.
Според судските документи, неколку жени изјавиле дека биле намамени со ветувања за заработка од илјадници долари месечно, но подоцна им бил оневозможен пристапот до нивните сметки и не можеле да располагаат со парите што ги заработиле.
Тие тврдат дека биле принудувани секојдневно да поминуваат најмалку осум часа во комуникација со „обожаватели“, а дополнително да снимаат видеосодржина. Кога одбивале да ги исполнат барањата, наводно биле заплашувани, тепани и физички ограничувани.
За време на акцијата бил уапсен еден маж поврзан со истрагата, за кого е одредена кауција од пет милиони долари. Тој треба да се појави пред суд, додека истрагата за случајот продолжува.
