Авион на американската компанија „Кенмор Ер“ се урна во морето во близина на Сиетл, по што бил зафатен од пожар. Во несреќата сите 11 лица што се наоѓале во леталото биле спасени, но четири лица се повредени, од кои едно е во критична состојба.
Несреќата се случила во четвртокот вечерта во близина на островот Сјуша, додека авионот летал кон Рош Харбор на островите Сан Хуан. Според соопштението на компанијата и американската Крајбрежна стража, леталото принудно слетало во заливот Шалоу Беј, по што избувнал пожар.
На фотографиите и снимките од местото на несреќата се гледаат остатоци од авионот расфрлани по карпите и во морето, додека од урнатините се издигал густ црн чад.
Две од повредените лица биле пренесени во болници во Белингем, а уште две биле транспортирани на островот Оркас за лекарски преглед. Според локалниот шериф, повредите вклучуваат повреди на главата, скршеници и расекотини.
Во моментот на несреќата, подрачјето било зафатено од грмежи и нестабилно време, со налети на ветер и намалена видливост, соопшти Националната метеоролошка служба.
Податоците од сервисот FlightRadar24 покажуваат дека авионот полетал од Сиетл во 16:33 часот по локално време. По промена на курсот во близина на островот Волдрон, леталото нагло изгубило висина и се урнало во близина на островот Сјуша.
Од компанијата „Кенмор Ер“ соопштија дека ги активирале процедурите за вонредни ситуации и дека е прерано да се шпекулира за причините за несреќата.
„Благодарни сме што сите лица кои беа во авионот се пронајдени. Наш приоритет е патниците и пилотот да ја добијат сета потребна медицинска грижа и поддршка“, изјави извршниот директор на компанијата, Дејвид Гуџел.
Авионот што се урна е модел de Havilland DHC-3 Otter, кој може да превезува до 10 патници и е најголемиот хидроавион во флотата на компанијата.
