(Видео) Австралија истражува мистериозни метални кугли пронајдени на плажите

Шест мистериозни метални објекти се појавија на плажите во северниот дел на австралиската сојузна држава Квинсленд, а експертите не ја исклучуваат можноста да станува збор за делови од ракети, познати како „вселенски кугли“, кои би можеле да содржат и остатоци од токсично ракетно гориво.

— реклама —

Австралиската вселенска агенција соопшти дека, во соработка со полицијата и Националната агенција за управување со вонредни состојби, работи на утврдување на потеклото и природата на пронајдените објекти.

Металните сфери биле откриени на плажите во близина на Форест Бич, кај Таунсвил. Од Противпожарната служба на Квинсленд информираа дека се пронајдени вкупно шест објекти и предупредија дека во наредните денови е можно морето да исфрли уште сличен отпад. Иако засега нема непосредна опасност за населението, граѓаните се повикани да ги следат упатствата на надлежните институции.

— реклама —

Вселенската археологинка и експерт за вселенски отпад, професорката Алис Горман од Универзитетот „Флиндерс“, по прегледот на снимките изјави дека предметите не покажуваат траги од горење, што упатува дека најверојатно потекнуваат од делови на ракета кои повторно влегле во атмосферата.

— реклама —

Според неа, изгледот на објектите одговара на резервоари под притисок што се користат во системите за гориво на ракетите. Таа предупреди дека, доколку навистина станува збор за вакви компоненти, можно е во нив да има остатоци од хидразин – високо токсично ракетно гориво. Сепак, Горман нагласува дека не може целосно да се исклучи можноста предметите да имаат и морско потекло.

Експертите посочуваат дека ваквите „вселенски кугли“ се меѓу најчестите видови вселенски отпад што се пронаоѓаат низ светот. Се проценува дека околу Земјата кружат повеќе од 30.000 парчиња вселенски отпад, а со зголемувањето на бројот на вселенски лансирања во последните години, расте и ризикот од нивно враќање на Земјата.